₹1.4 ಕೋಟಿ ವೈದ್ಯಕೀಯ ಸೀಟು ವಂಚನೆ ಪ್ರಕರಣ: ದಂಪತಿ ವಿರುದ್ಧದ ಪ್ರಕರಣ ರದ್ದುಗೊಳಿಸಲು ಹೈಕೋರ್ಟ್ ನಿರಾಕರಣೆ
ತಮ್ಮ ಮಗಳಿಗೆ ವೈದ್ಯಕೀಯ (ಎಂ‍ಬಿಬಿಎಸ್) ಸೀಟು ಕೊಡಿಸುವುದಾಗಿ ನಂಬಿಸಿ ತಾಯಿಯೊಬ್ಬರಿಂದ ₹1.4 ಕೋಟಿ ಹಣ ಪಡೆದು ವಂಚಿಸಿದ ಆರೋಪ ಎದುರಿಸುತ್ತಿರುವ ದಂಪತಿ ವಿರುದ್ಧದ ಕ್ರಿಮಿನಲ್ ಪ್ರಕರಣವನ್ನು ರದ್ದುಗೊಳಿಸಲು ಕರ್ನಾಟಕ ಹೈಕೋರ್ಟ್ ನಿರಾಕರಿಸಿದೆ. ಬೆಂಗಳೂರಿನ ಬಾಗಲಗುಂಟೆ ಪೊಲೀಸ್ ಠಾಣೆಯಲ್ಲಿ ದಾಖಲಾಗಿದ್ದ ಎಫ್‌ಐಆರ್ ಸಿಂಧುತ್ವವನ್ನು ಪ್ರಶ್ನಿಸಿ ಆರೋಪಿಗಳಾದ ಶಿಲ್ಪಾ ಎ. ಮತ್ತು ಆಕೆಯ ಪತಿ ಕಿರಣ್ ಕುಮಾರ್ ಪಿ. ಸಲ್ಲಿಸಿದ್ದ ಅರ್ಜಿಯನ್ನು ನ್ಯಾಯಮೂರ್ತಿ ಎಂ. ನಾಗಪ್ರಸನ್ನ ಅವರ ಪೀಠ ವಜಾಗೊಳಿಸಿದೆ.
ಪ್ರಕರಣದ ವಿವರಗಳ ಪ್ರಕಾರ, ದೂರುದಾರರ ಮಗಳು 2023 ರ ನೀಟ್ (NEET) ಪರೀಕ್ಷೆಗೆ ಹಾಜರಾಗಿದ್ದರೂ ಸೂಕ್ತ ಶ್ರೇಯಾಂಕ ಗಳಿಸಿರಲಿಲ್ಲ. 2023 ರ ಫೆಬ್ರವರಿಯಲ್ಲಿ, ದೂರುದಾರರು ಶಿಲ್ಪಾ ಕೆಲಸ ಮಾಡುತ್ತಿದ್ದ ಆಸ್ಪತ್ರೆಗೆ ತೆರಳಿದ್ದಾಗ, ತಮಗೆ ಮತ್ತು ತಮ್ಮ ಪತಿಗೆ ಪ್ರಭಾವಿ ವ್ಯಕ್ತಿಗಳ ಪರಿಚಯವಿದ್ದು ವೈದ್ಯಕೀಯ ಸೀಟು ಕೊಡಿಸುವುದಾಗಿ ಶಿಲ್ಪಾ ಭರವಸೆ ನೀಡಿದ್ದರು. ಇದನ್ನು ನಂಬಿದ ದೂರುದಾರರು ಆರಂಭದಲ್ಲಿ ₹35 ಲಕ್ಷ ನಗದನ್ನು ನೀಡಿದ್ದು, ನಂತರ ಕಂತುಗಳಲ್ಲಿ ₹1.05 ಕೋಟಿ ಹಣವನ್ನು ಕಿರಣ್ ಕುಮಾರ್ ಅವರ ಬ್ಯಾಂಕ್ ಖಾತೆಗೆ ವರ್ಗಾಯಿಸಿದ್ದರು.
ಆದರೆ, ಒಟ್ಟು ₹1.40 ಕೋಟಿ ಹಣ ಪಡೆದ ನಂತರ ದಂಪತಿ ಸೀಟು ಕೊಡಿಸದೇ ವಂಚಿಸಿ ಸಂಪರ್ಕಕ್ಕೆ ಸಿಗದೇ ತಪ್ಪಿಸಿಕೊಂಡಿದ್ದರು. ಈ ಕುರಿತು ದೂರು ದಾಖಲಾದ ನಂತರ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದರು. ಮಗಳ ಶಿಕ್ಷಣಕ್ಕಾಗಿ ತಾಯಿಯೊಬ್ಬರು ಇಟ್ಟುಕೊಂಡಿದ್ದ ಆಶಯವನ್ನು ಆರ್ಥಿಕ ಶೋಷಣೆಯ ಸಾಧನವನ್ನಾಗಿ ಮಾಡಿಕೊಳ್ಳಲಾಗಿದೆ ಎಂದು ತೀವ್ರ ಕಳವಳ ವ್ಯಕ್ತಪಡಿಸಿದ ಹೈಕೋರ್ಟ್, ಪ್ರಕರಣದ ಸತ್ಯಾಸತ್ಯತೆ ಹೊರತರಲು ತನಿಖಾ ಸಂಸ್ಥೆಗೆ ಪೂರ್ಣ ಅವಕಾಶ ನೀಡಬೇಕೆಂದು ಆದೇಶಿಸಿದೆ.
