ಬೆಂಗಳೂರಿನ ಜ್ಞಾನಿ ಎಐ ಅಭಿವೃದ್ಧಿಪಡಿಸಿದ ಸ್ವದೇಶಿ 'ಜ್ಞಾನಿ ಅರ್ಥ' ಎಐ ತಂತ್ರಜ್ಞಾನ ವ್ಯವಸ್ಥೆ ಉದ್ಘಾಟಿಸಿದ ಉಪರಾಷ್ಟ್ರಪತಿ
ನವದೆಹಲಿಯ ಉಪರಾಷ್ಟ್ರಪತಿ ಭವನದಲ್ಲಿ ನಡೆದ ಸಮಾರಂಭದಲ್ಲಿ ಉಪರಾಷ್ಟ್ರಪತಿ ಸಿ. ಪಿ. ರಾಧಾಕೃಷ್ಣನ್ ಅವರು ಬೆಂಗಳೂರು ಮೂಲದ ದೀಪ್-ಟೆಕ್ ಸಂಸ್ಥೆ 'ಜ್ಞಾನಿ ಎಐ' ಅಭಿವೃದ್ಧಿಪಡಿಸಿರುವ 'ಜ್ಞಾನಿ ಅರ್ಥ' ಎಂಬ ಸ್ವದೇಶಿ ಕೃತಕ ಬುದ್ಧಿಮತ್ತೆ (ಎಐ) ತಂತ್ರಜ್ಞಾನ ವ್ಯವಸ್ಥೆಯನ್ನು ಉದ್ಘಾಟಿಸಿದರು. ಈ ತಂತ್ರಜ್ಞಾನ ವ್ಯವಸ್ಥೆಯು ಎರಡು ಮುಖ್ಯ ವಿಭಾಗಗಳನ್ನು ಹೊಂದಿದೆ: 11 ಭಾರತೀಯ ಭಾಷೆಗಳಲ್ಲಿ ತರಬೇತಿ ಪಡೆದಿರುವ 30 ಶತಕೋಟಿ ನಿಯತಾಂಕಗಳ 'ಇವಾನ್ 3.3' ಲಾರ್ಜ್ ಲ್ಯಾಂಗ್ವೇಜ್ ಮಾಡೆಲ್ ಮತ್ತು ಸಾಂಸ್ಥಿಕ ಕಾರ್ಯನಿರತ ವ್ಯವಸ್ಥೆಗಳಿಗೆ ಎಐ ಕಾರ್ಯಾಚರಣೆಗಳನ್ನು ಸಂಯೋಜಿಸುವ 'ಪ್ಲೆಕ್ಸಸ್' ಪ್ಲಾಟ್‌ಫಾರ್ಮ್.
ಕಾರ್ಯಕ್ರಮದಲ್ಲಿ ಮಾತನಾಡಿದ ಉಪರಾಷ್ಟ್ರಪತಿ ರಾಧಾಕೃಷ್ಣನ್ ಅವರು, ಜ್ಞಾನಿ ಅರ್ಥ ವ್ಯವಸ್ಥೆಯು ಭಾರತದ ಎಐ ತಂತ್ರಜ್ಞಾನ ಕ್ಷೇತ್ರದ ಸಾಮರ್ಥ್ಯವನ್ನು ಪ್ರತಿಬಿಂಬಿಸುತ್ತದೆ ಎಂದು ಪ್ರಶಂಸಿಸಿದರು. ವಿದೇಶಿ ಎಐ ತಂತ್ರಜ್ಞಾನಗಳನ್ನು ಕೇವಲ ಬಳಸಿಕೊಳ್ಳುವುದಷ್ಟೇ ಅಲ್ಲದೆ, ದೇಶದ ಅಗತ್ಯಗಳಿಗೆ ತಕ್ಕಂತೆ ಸ್ವಂತ ಎಐ ಮಾದರಿಗಳನ್ನು ನಿರ್ಮಿಸುವ ಸಾಮರ್ಥ್ಯ ಭಾರತೀಯ ಎಂಜಿನಿಯರ್‌ಗಳಲ್ಲಿದೆ ಎಂದು ಅವರು ಹೇಳಿದರು. ಹಿಂದೆ ಐಟಿ ವಲಯವು ದೇಶದಲ್ಲಿ ಲಕ್ಷಾಂತರ ಉದ್ಯೋಗಗಳನ್ನು ಸೃಷ್ಟಿಸಿದಂತೆ, ಕೃತಕ ಬುದ್ಧಿಮತ್ತೆಯು ಆರ್ಥಿಕ ಪ್ರಗತಿ, ನಾವೀನ್ಯತೆ ಮತ್ತು ಹೊಸ ಉದ್ಯೋಗಾವಕಾಶಗಳಿಗೆ ಬಾಗಿಲು ತೆರೆಯಲಿದೆ ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದರು.
ಜ್ಞಾನಿ ಅರ್ಥ ವ್ಯವಸ್ಥೆಯು ಮಿಕ್ಸ್‌ಚರ್-ಆಫ್-ಎಕ್ಸ್‌ಪರ್ಟ್ಸ್ ವಿನ್ಯಾಸ ಹಾಗೂ ಭಾರತೀಯ ಭಾಷೆಗಳ ಲಿಪಿಗಳಿಗೆ ಸೂಕ್ತವಾದ ವಿಶಿಷ್ಟ ಟೋಕನೈಜರ್ ಹೊಂದಿದ್ದು, ಜಾಗತಿಕ ಮಾದರಿಗಳಿಗೆ ಹೋಲಿಸಿದರೆ ಶೇಕಡಾ 20 ರಷ್ಟು ಕಡಿಮೆ ಟೋಕನ್‌ಗಳನ್ನು ಬಳಸುತ್ತದೆ. ಭಾರತೀಯ ಉದ್ಯಮಗಳು ಹಾಗೂ ಸರ್ಕಾರಿ ಸಂಸ್ಥೆಗಳಿಗೆ ಸ್ವಂತ ದತ್ತಾಂಶ ಸುರಕ್ಷತೆಯೊಂದಿಗೆ ಕಾರ್ಯನಿರ್ವಹಿಸಲು ಇದು ನೆರವಾಗಲಿದ್ದು, 'ಇಂಡಿಯಾ ಎಐ ಮಿಷನ್' ಅಡಿಯಲ್ಲಿ ಭಾರತವು ತಂತ್ರಜ್ಞಾನ ಸ್ವಾವಲಂಬನೆ ಸಾಧಿಸಲು ಇದು ಮಹತ್ವದ ಹೆಜ್ಜೆಯಾಗಿದೆ.
