ಬಿಐಎಸ್ ದಾಳಿ: ಬೆಂಗಳೂರಿನಲ್ಲಿ 5 ಕೋಟಿ ರೂ. ಮೌಲ್ಯದ ಎಲೆಕ್ಟ್ರಾನಿಕ್ ಪ್ರೊಜೆಕ್ಟರ್‌ಗಳ ವಶ
ಭಾರತೀಯ ಪ್ರಮಾಣಕ ಬ್ಯೂರೋ (BIS) ಬೆಂಗಳೂರು ಶಾಖೆಯ ಅಧಿಕಾರಿಗಳು ಯಲಹಂಕ ನ್ಯೂಟೌನ್‌ನ ಝೆಬ್ಲೇಜ್ ಸೊಲ್ಯೂಷನ್ಸ್ ಎಲ್‌ಎಲ್‌ಪಿ ಸಂಸ್ಥೆಯ ಮೇಲೆ ದಾಳಿ ನಡೆಸಿ, ಕಾನೂನುಬಾಹಿರವಾಗಿ ಬಿಐಎಸ್ ನೋಂದಣಿ ಮಾರ್ಕ್ ಬಳಸುತ್ತಿದ್ದ ₹5 ಕೋಟಿ ಮೌಲ್ಯದ 1,350 ಎಲೆಕ್ಟ್ರಾನಿಕ್ ವೀಡಿಯೊ ಪ್ರೊಜೆಕ್ಟರ್‌ಗಳನ್ನು ವಶಪಡಿಸಿಕೊಂಡಿದ್ದಾರೆ. ಕೇಂದ್ರ ಗ್ರಾಹಕ ವ್ಯವಹಾರಗಳ ಸಚಿವಾಲಯದ ಹಿರಿಯ ಅಧಿಕಾರಿಗಳ ನೇತೃತ್ವದಲ್ಲಿ ಈ ಕಾರ್ಯಾಚರಣೆ ನಡೆದಿದೆ.
ದಾಳಿಗೊಳಗಾದ ಸಂಸ್ಥೆಯು 'WZATCO' ಬ್ರ್ಯಾಂಡ್ ಹೆಸರಿನಲ್ಲಿ ಈ ಪ್ರೊಜೆಕ್ಟರ್‌ಗಳನ್ನು ಮಾರಾಟ ಮಾಡುತ್ತಿತ್ತು. ಬಿಐಎಸ್ ಕಾಯ್ದೆ 2016ರ ನಿಯಮಾವಳಿಗಳನ್ನು ಉಲ್ಲಂಘಿಸಿ, ಯಾವುದೇ ಅಧಿಕೃತ ಅನುಮತಿಯಿಲ್ಲದೆ ಪ್ರೊಜೆಕ್ಟರ್‌ಗಳ ಮೇಲೆ ಬಿಐಎಸ್ ನೋಂದಣಿ ಮುದ್ರೆಯನ್ನು ಬಳಸಲಾಗಿತ್ತು. ಇಂತಹ ನಕಲಿ ಪ್ರಮಾಣಪತ್ರ ಮುದ್ರೆಗಳು ಗ್ರಾಹಕರನ್ನು ದಾರಿ ತಪ್ಪಿಸುವುದಲ್ಲದೆ, ಅಪಾಯಕಾರಿ ವಿದ್ಯುನ್ಮಾನ ಉಪಕರಣಗಳ ಬಳಕೆಗೂ ಕಾರಣವಾಗುತ್ತವೆ ಎಂದು ಅಧಿಕಾರಿಗಳು ಎಚ್ಚರಿಸಿದ್ದಾರೆ. ಪ್ರಕರಣಕ್ಕೆ ಸಂಬಂಧಿಸಿದಂತೆ ಸಂಸ್ಥೆಯ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಲಾಗುತ್ತಿದ್ದು, ಗ್ರಾಹಕರ ಹಕ್ಕುಗಳನ್ನು ರಕ್ಷಿಸಲು ಇಂತಹ ದಾಳಿಗಳನ್ನು ಮುಂದುವರಿಸಲಾಗುವುದು ಎಂದು ಬಿಐಎಸ್ ತಿಳಿಸಿದೆ.
