ಎಐ ಇಂಟರ್‌ಫೇಸ್‌ಗಳಲ್ಲಿ ಶಾಪಿಂಗ್‌ಗೆ ಅವಕಾಶ ನೀಡುವ 'ಬ್ರೀಜ್ ಯುನಿವರ್ಸಲ್' ವೇದಿಕೆ ಅನಾವರಣಗೊಳಿಸಿದ ಜಸ್‌ಪೇ
ಬೆಂಗಳೂರು ಮೂಲದ ಪ್ರಮುಖ ಡಿಜಿಟಲ್ ಪಾವತಿ ತಂತ್ರಜ್ಞಾನ ಸಂಸ್ಥೆಯಾದ ಜಸ್‌ಪೇ, 'ಬ್ರೀಜ್ ಯುನಿವರ್ಸಲ್' ಎಂಬ ವಿನೂತನ ಈ-ಕಾಮರ್ಸ್ ಪೈಲಟ್ ವೇದಿಕೆಯನ್ನು ಜಾಗತಿಕ ಮಟ್ಟದಲ್ಲಿ ಅನಾವರಣಗೊಳಿಸಿದೆ. ಈ ತಂತ್ರಜ್ಞಾನವು ವರ್ತಕರ ಉತ್ಪನ್ನಗಳ ಪಟ್ಟಿಯನ್ನು ಕೃತಕ ಬುದ್ಧಿಮತ್ತೆ ಆಧಾರಿತ ಸಂಭಾಷಣಾ ವೇದಿಕೆಗಳಿಗೆ ನೇರವಾಗಿ ಜೋಡಿಸಲು ನೆರವಾಗುತ್ತದೆ. ಓಪನ್‌ಎಐ ಸಂಸ್ಥೆಯ ಚಾಟ್‌ಜಿಪಿಟಿ, ಆಂಥ್ರೋಪಿಕ್‌ನ ಕ್ಲಾಡ್ ಹಾಗೂ ವಿವಿಧ ಬ್ಯಾಂಕುಗಳು ಮತ್ತು ವರ್ತಕರ ಸ್ವಂತ ಡಿಜಿಟಲ್ ಅಪ್ಲಿಕೇಶನ್‌ಗಳಲ್ಲಿ ನಡೆಯುವ ಒಂದೇ ಎಐ ಸಂಭಾಷಣೆಯ ಮೂಲಕವೇ ಗ್ರಾಹಕರು ವಿವಿಧ ಬ್ರಾಂಡ್‌ಗಳ ಉತ್ಪನ್ನಗಳನ್ನು ಹುಡುಕಲು, ಹೋಲಿಕೆ ಮಾಡಲು ಮತ್ತು ಖರೀದಿಸಲು ಈ ವೇದಿಕೆ ಅನುವು ಮಾಡಿಕೊಡುತ್ತದೆ.
ಗೂಗಲ್‌ನ 'ಯುನಿವರ್ಸಲ್ ಕಾಮರ್ಸ್ ಪ್ರೋಟೋಕಾಲ್' (ಯುಸಿಪಿ) ಆಧಾರದಲ್ಲಿ ನಿರ್ಮಿಸಲಾಗಿರುವ ಬ್ರೀಜ್ ಯುನಿವರ್ಸಲ್, ಶಾಪೈಫೈ, ವೂಕಾಮರ್ಸ್, ಮೆಜೆಂಟೋ ಹಾಗೂ ಇತರೆ ಕಸ್ಟಮ್ ವ್ಯಾಪಾರ ವೇದಿಕೆಗಳಲ್ಲಿರುವ ವರ್ತಕರ ಉತ್ಪನ್ನಗಳ ಕ್ಯಾಟಲಾಗ್‌ಗಳನ್ನು ಸುಲಭವಾಗಿ ಸಂಯೋಜಿಸುತ್ತದೆ. ಯಾವುದೇ ಸಂಕೀರ್ಣ ಕೋಡಿಂಗ್ ಅಥವಾ ತಾಂತ್ರಿಕ ಅಡೆತಡೆಗಳಿಲ್ಲದೆ ಬ್ಯಾಂಕುಗಳು, ಫಿನ್‌ಟೆಕ್ ಸಂಸ್ಥೆಗಳು ಮತ್ತು ಬ್ರಾಂಡ್‌ಗಳು ಎಐ ಆಧಾರಿತ ಶಾಪಿಂಗ್ ಸೌಲಭ್ಯವನ್ನು ತಮ್ಮ ಗ್ರಾಹಕರಿಗೆ ನೀಡಬಹುದು. ಪಾವತಿ ತಂತ್ರಜ್ಞಾನ ಕ್ಷೇತ್ರಕ್ಕೆ ಸೀಮಿತವಾಗಿದ್ದ ಜಸ್‌ಪೇ, ಪ್ರವರ್ಧಮಾನಕ್ಕೆ ಬರುತ್ತಿರುವ ಜೆನರೇಟಿವ್ ಎಐ ವಲಯದಲ್ಲಿ ಉತ್ಪನ್ನ ಶೋಧನೆಯ ಪ್ರಮುಖ ಹಂತವನ್ನು ತನ್ನ ವಶಕ್ಕೆ ಪಡೆದುಕೊಳ್ಳಲು ಈ ನಿರ್ಧಾರ ಕೈಗೊಂಡಿದೆ.
