ಹೊಳೆನರಸೀಪುರ: ಮಳಲಿ ಲಕ್ಷ್ಮೀದೇವಿ ದೇವಾಲಯದಲ್ಲಿ ಅರ್ಚಕರ ಪೂಜೆ ಹಕ್ಕು ಜಟಾಪಟಿ; ತಹಸೀಲ್ದಾರ್ ಮಧ್ಯಸ್ಥಿಕೆಯಿಂದ ತಂಗಾಳಿ
ಹೊಳೆನರಸೀಪುರ ತಾಲೂಕಿನ ಐತಿಹಾಸಿಕ ಪ್ರಸಿದ್ಧ ಮಳಲಿ ಗ್ರಾಮದ ಶ್ರೀ ಲಕ್ಷ್ಮೀದೇವಿ ದೇವಾಲಯದಲ್ಲಿ ಅರ್ಚಕ ಕುಟುಂಬಗಳ ನಡುವೆ ಸರದಿ ಪೂಜೆ ವಿಚಾರವಾಗಿ ಉಂಟಾದ ಮನಸ್ತಾಪದಿಂದಾಗಿ ಸೋಮವಾರ ಮುಂಜಾನೆ ದೇವಸ್ಥಾನದ ಪೂಜಾ ಕೈಂಕರ್ಯಗಳಿಗೆ ತಾತ್ಕಾಲಿಕ ತಡೆ ಉಂಟಾಯಿತು. ತಲೆಮಾರುಗಳಿಂದ ಯಾದವ ಸಮುದಾಯಕ್ಕೆ ಸೇರಿದ 24 ಕುಟುಂಬಗಳು ತಲಾ 15 ದಿನಗಳಂತೆ ದೇವಸ್ಥಾನದಲ್ಲಿ ಸರದಿ ಪೂಜೆ ನೆರವೇರಿಸಿಕೊಂಡು ಬಂದಿದ್ದವು. ಆದರೆ ದೇವಾಲಯವು ಮುಜರಾಯಿ ಇಲಾಖೆಯ ವ್ಯಾಪ್ತಿಗೆ ಒಳಪಟ್ಟಿರುವುದರಿಂದ ಸರ್ಕಾರದಿಂದ ಅರ್ಚಕರ ನೇಮಕಾತಿ ಆದೇಶ ಕಡ್ಡಾಯವಾಗಿದೆ.
ಅರ್ಚಕತ್ವಕ್ಕೆ ಅರ್ಜಿ ಸಲ್ಲಿಸಿದ್ದ 19 ಕುಟುಂಬಗಳ ಪೈಕಿ ಕೇವಲ 6 ಕುಟುಂಬಗಳಿಗೆ ಮಾತ್ರ ತಾಲೂಕು ಆಡಳಿತದಿಂದ ನೇಮಕಾತಿ ಆದೇಶ ದೊರೆತಿತ್ತು. ಉಳಿದ 13 ಕುಟುಂಬಗಳಿಗೆ ಆದೇಶ ಸಿಗದ ಕಾರಣ ಅವರನ್ನು ಪೂಜಾ ಹಕ್ಕಿನಿಂದ ಹೊರಗಿಡಲು ಯತ್ನಿಸಿದಾಗ ವಿವಾದ ಉಂಟಾಯಿತು. ಇದರಿಂದ ಸೋಮವಾರ ಮುಂಜಾನೆ ದೇವಾಲಯದ ಬಾಗಿಲು ತೆರೆಯದೆ ಮುಚ್ಚಲ್ಪಟ್ಟಿದ್ದರಿಂದ ದರ್ಶನಕ್ಕಾಗಿ ಕಾಯುತ್ತಿದ್ದ ಭಕ್ತಾದಿಗಳಿಗೆ ತೀವ್ರ ಮುಜುಗರ ಹಾಗೂ ತೊಂದರೆಯಾಯಿತು.
ಘಟನೆಯ ಮಾಹಿತಿ ತಿಳಿದ ತಕ್ಷಣ ಸ್ಥಳಕ್ಕೆ ಆಗಮಿಸಿದ ಹೊಳೆನರಸೀಪುರ ತಹಸೀಲ್ದಾರ್ ವೈ.ಎಂ. ರೇಣುಕುಮಾರ್ ಅವರು ಅರ್ಚಕ ಕುಟುಂಬಗಳೊಂದಿಗೆ ಸಭೆ ನಡೆಸಿ ಮಧ್ಯಸ್ಥಿಕೆ ವಹಿಸಿದರು. ದಾಖಲೆಗಳನ್ನು ಪರಿಶೀಲಿಸಿ ಶೀಘ್ರವೇ ಶಾಶ್ವತ ಪರಿಹಾರ ಒದಗಿಸುವುದಾಗಿ ಭರವಸೆ ನೀಡಿದರು. ತಹಸೀಲ್ದಾರರ ಭರವಸೆಯ ನಂತರ ದೇವಸ್ಥಾನದ ಬಾಗಿಲು ತೆರೆದು ಪೂಜಾ ಕೈಂಕರ್ಯಗಳನ್ನು ಪುನರಾರಂಭಿಸಲಾಯಿತು, ಇದರಿಂದ ಸುದೀರ್ಘ ಸಮಯದಿಂದ ಕಾಯುತ್ತಿದ್ದ ಭಕ್ತರಿಗೆ ದೇವಿಯ ದರ್ಶನ ಲಭಿಸಿತು.
