ಕಲಬುರಗಿ: ವಾಹನ ಸವಾರರಿಗೆ ಇ-ಚಲನ್ ಬಿಸಿ; 6 ಕಡೆ ಎಐ ಕ್ಯಾಮೆರಾ ಸ್ಥಾಪಿಸಿದ ಪೊಲೀಸ್ ಇಲಾಖೆ
ಕಲಬುರಗಿ ವ್ಯಾಪ್ತಿಯಲ್ಲಿ ರಸ್ತೆ ಸುರಕ್ಷತೆ ಹೆಚ್ಚಿಸಲು ಹಾಗೂ ಸಂಚಾರ ನಿಯಮಗಳ ಉಲ್ಲಂಘನೆಗೆ ತಡೆ ಹಾಕಲು ಕಲಬುರಗಿ ಜಿಲ್ಲಾ ಪೊಲೀಸ್ ಇಲಾಖೆಯು 12 ಕೃತಕ ಬುದ್ಧಿಮತ್ತೆ (ಎಐ) ಆಧಾರಿತ ಕ್ಯಾಮೆರಾಗಳನ್ನು ಆರು ಪ್ರಮುಖ ರಸ್ತೆ ಮಾರ್ಗಗಳಲ್ಲಿ ಅಳವಡಿಸಿದೆ. ಈ ಕುರಿತು ಮಾಹಿತಿ ನೀಡಿರುವ ಜಿಲ್ಲಾ ಪೊಲೀಸ್ ವರಿಷ್ಠಾಧಿಕಾರಿ ಅಡ್ಡೂರು ಶ್ರೀನಿವಾಸುಲು, ಇ-ಚಲನ್ ನಿಯಮ ಜಾರಿಗೆ ತರುವ ಮುನ್ನ ಎರಡು ಮೂರು ವಾರಗಳ ಕಾಲ ಪ್ರಾಯೋಗಿಕ ಪರೀಕ್ಷೆ ನಡೆಸಲಾಗುವುದು ಎಂದು ತಿಳಿಸಿದ್ದಾರೆ.
ಕಲಬುರಗಿ-ಹುಮ್ನಾಬಾದ್, ಕಲಬುರಗಿ-ಸೇಡಂ, ಕಲಬುರಗಿ-ಆಳಂದ್, ಗೋಬುರವಾಡಿ-ಚೌಡಾಪುರ, ಜೇವರ್ಗಿ-ಸಿಂದಗಿ ಹಾಗೂ ಶಹಾಬಾದ್-ಯಾದಗಿರಿ ಹೆದ್ದಾರಿ ಜಂಕ್ಷನ್‌ಗಳಲ್ಲಿ ಈ ಸುಧಾರಿತ ಕ್ಯಾಮೆರಾಗಳನ್ನು ಸ್ಥಾಪಿಸಲಾಗಿದೆ. ಹೆಲ್ಮೆಟ್ ಧರಿಸದಿರುವುದು, ತ್ರಿಬಲ್ ರೈಡಿಂಗ್, ಚಾಲನೆ ವೇಳೆ ಮೊಬೈಲ್ ಬಳಕೆ, ಸೀಟ್ ಬೆಲ್ಟ್ ಧರಿಸದಿರುವುದು, ಮಿತಿಮೀರಿದ ವೇಗ ಹಾಗೂ ಒನ್-ವೇ ಸಂಚಾರ ಉಲ್ಲಂಘನೆಗಳನ್ನು ಈ ಎಐ ಸಿಸ್ಟಮ್ ಸ್ವಯಂಚಾಲಿತವಾಗಿ ಪತ್ತೆಹಚ್ಚಲಿದೆ.
ಪ್ರಾಯೋಗಿಕ ಅವಧಿ ಪೂರ್ಣಗೊಂಡ ನಂತರ ನಿಯಮ ಉಲ್ಲಂಘಿಸುವ ವಾಹನ ಮಾಲೀಕರಿಗೆ ನೇರವಾಗಿ ಇ-ಚಲನ್ ದಂಡದ ನೋಟಿಸ್ ರವಾನೆಯಾಗಲಿದೆ. ಇದರಿಂದ ಕಲಬುರಗಿ ತಾಲ್ಲೂಕು ಹಾಗೂ ನಗರ ಪ್ರದೇಶದ ವಾಹನ ಸವಾರರು ಕಡ್ಡಾಯವಾಗಿ ರಸ್ತೆ ಸಂಚಾರ ನಿಯಮಗಳನ್ನು ಪಾಲಿಸಬೇಕಾಗಿದೆ.
