ಮಂಗಳೂರಿನ ಕೆಎಂಸಿ ಆಸ್ಪತ್ರೆಯಲ್ಲಿ ಅಪೆಂಡಿಕ್ಸ್ ಸಮಸ್ಯೆಯಿಂದ ಬಳಲುತ್ತಿದ್ದ 16 ವರ್ಷದ ಬಾಲಕಿಗೆ ಇಸಿಎಂಒ ಚಿಕಿತ್ಸೆ: ಯಶಸ್ವಿ ಚೇತರಿಕೆ
ಮಂಗಳೂರಿನ ಬಿ.ಆರ್. ಅಂಬೇಡ್ಕರ್ ವೃತ್ತದಲ್ಲಿರುವ ಕೆಎಂಸಿ ಆಸ್ಪತ್ರೆಯಲ್ಲಿ ಅಪೆಂಡಿಕ್ಸ್ ಸ್ಫೋಟಗೊಂಡು ತುರ್ತು ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದ 16 ವರ್ಷದ ಬಾಲಕಿಯೊಬ್ಬಳು ತೀವ್ರ ಜೀವಾಪಾಯದ ಸ್ಥಿತಿಯಿಂದ ಪವಾಡಸದೃಶ ರೀತಿಯಲ್ಲಿ ಚೇತರಿಸಿಕೊಂಡಿದ್ದಾರೆ. ಮತ್ತೊಂದು ಆಸ್ಪತ್ರೆಯಲ್ಲಿ ಶಸ್ತ್ರಚಿಕಿತ್ಸೆ ಪಡೆದ ನಂತರ ಬಾಲಕಿಗೆ ಸಿಸ್ಟಮಿಕ್ ಇನ್‌ಫ್ಲಮೇಟರಿ ರೆಸ್ಪಾನ್ಸ್ ಸಿಂಡ್ರೋಮ್ (SIRS) ಕಾಣಿಸಿಕೊಂಡು ಆರೋಗ್ಯ ತೀವ್ರವಾಗಿ ಕ್ಷೀಣಿಸಿತು. ಈ ವೇಳೆ ಬಾಲಕಿಗೆ ಹೃದಯಾಘಾತ ಸಂಭವಿಸಿದ್ದು, ವೈದ್ಯರು ಆರು ಬಾರಿ ಸಿಪಿಆರ್ (CPR) ನೀಡಿ ಜೀವ ಮರಳಿ ತಂದಿದ್ದರು.
ಆದಾಗ್ಯೂ, ಮೆದುಳಿಗೆ ಆಮ್ಲಜನಕದ ಪೂರೈಕೆ ಕಡಿಮೆಯಾಗಿ ಹೈಪಾಕ್ಸಿಕ್ ಬ್ರೈನ್ ಇಂಜುರಿ ಉಂಟಾಯಿತು ಹಾಗೂ ಹೃದಯದ ಕಾರ್ಯಕ್ಷಮತೆ ತೀವ್ರ ಕುಸಿಯಿತು. ಪರಿಸ್ಥಿತಿಯ ಗಂಭೀರತೆಯನ್ನು ಅರಿತ ಕೆಎಂಸಿ ಆಸ್ಪತ್ರೆಯ ಕ್ರಿಟಿಕಲ್ ಕೇರ್ ವಿಭಾಗದ ಮುಖ್ಯಸ್ಥ ಡಾ. ದತ್ತಾತ್ರೇಯ ಪ್ರಭು ಮತ್ತು ಪೀಡಿಯಾಟ್ರಿಕ್ ಇಂಟೆನ್ಸಿವಿಸ್ಟ್ ಡಾ. ಸ್ವಾತಿ ರಾವ್ ನೇತೃತ್ವದ ವೈದ್ಯರ ತಂಡ ಬಾಲಕಿಗೆ ತಕ್ಷಣವೇ ಇಸಿಎಂಒ (ECMO - ಎಕ್ಸ್‌ಟ್ರಾಕಾರ್ಪೋರಿಯಲ್ ಮೆಂಬ್ರೇನ್ ಆಕ್ಸಿಜನೇಷನ್) ಜೀವ ರಕ್ಷಕ ವ್ಯವಸ್ಥೆಯನ್ನು ಅಳವಡಿಸಿತು. ಇಸಿಎಂಒ ತಂತ್ರಜ್ಞಾನವು ದೇಹದ ಹೊರಗೆ ರಕ್ತವನ್ನು ಸಂಸ್ಕರಿಸಿ, ಆಮ್ಲಜನಕ ನೀಡಿ ಪುನಃ ಸರಬರಾಜು ಮಾಡುವ ಮೂಲಕ ಹೃದಯ ಮತ್ತು ಶ್ವಾಸಕೋಶಕ್ಕೆ ವಿಶ್ರಾಂತಿ ನೀಡುತ್ತದೆ.
ಬಾಲಕಿಯನ್ನು ಸತತ ಎಂಟು ದಿನಗಳ ಕಾಲ ಇಸಿಎಂಒ ಬೆಂಬಲದಲ್ಲಿಟ್ಟು ಹಗಲಿರುಳು ನಿಗಾವಹಿಸಲಾಯಿತು. ಬಾಲಕಿಯ ಹೃದಯದ ಕಾರ್ಯಕ್ಷಮತೆ ಸುಧಾರಿಸಿದ ನಂತರ ವೈದ್ಯರು ಹಂತ ಹಂತವಾಗಿ ಜೀವ ರಕ್ಷಕ ವ್ಯವಸ್ಥೆಯನ್ನು ತೆರವುಗೊಳಿಸಿದರು. ಒಟ್ಟು 45 ದಿನಗಳ ಸುದೀರ್ಘ ಚಿಕಿತ್ಸೆ, ಜಾಗರೂಕ ಆರೈಕೆ ಹಾಗೂ ಪುನರ್ವಸತಿ ನಂತರ ಬಾಲಕಿ ಸಂಪೂರ್ಣ ಚೇತರಿಸಿಕೊಂಡು ಆಸ್ಪತ್ರೆಯಿಂದ ಬಿಡುಗಡೆಯಾಗಿದ್ದಾಳೆ.
ಮಂಗಳೂರಿನಲ್ಲಿ ಲಭ್ಯವಿರುವ ಇಂತಹ ಅತ್ಯಾಧುನಿಕ ವೈದ್ಯಕೀಯ ತಂತ್ರಜ್ಞಾನ ಹಾಗೂ ತೀವ್ರ ನಿಗಾ ಘಟಕಗಳ ಸೇವೆಗಳು ಕರಾವಳಿ ಭಾಗದ ಜನರಿಗೆ ತುರ್ತು ಸಂದರ್ಭಗಳಲ್ಲಿ ಮರುಜೀವ ನೀಡುತ್ತಿವೆ ಎಂದು ವೈದ್ಯಕೀಯ ತಜ್ಞರು ತಿಳಿಸಿದ್ದಾರೆ.
